يلا ندون صح

يلا ندون صح

طبعا كل واحد فينا قبل النوم بيقعد يفكر في اللي حصل في يومه النهارده ياتري عمل ايه صح وعمل ايه غلط واكيد النصيب الاكبر في التفكير بيكون للحدث الاكبر في اليوم
في واحده من تلك الليالي دخلت معي نفسي في حوار شديد اللهجه حيث كان هذا اليوم هو يوم البث المباشرللمدونه بتاعتي 23/6/2007

وكنت مرهق جدا جدا وجعان نوم كمان ودار هذا الحوار بيننا

نفسي : تعال هنا انت هتنام كده علي طول ...لالا اصحي كده وفوق واحكيلي عن الجريمه اللي انت ارتكتبها النهارده
وائل : جريمه ؟؟؟؟جريمة ايه ؟؟

نفسي : اه طبعا هوانت فاكر ان التدوين ده حاجه سهله واي حد يقول اللي هو عاوزه واي حد يتكلم في اي حاجه وده بقي غير وقتك اللي هتضيعه في القصه دي و.........ا
وائل: بس بس كفايه كده اهدي بس وتعالي نتكلم بالعقل عن التدوين مش عن الجريمه

نفسي: ماشي يا عم العاقل ممكن بقي تقولي انت عملت مدونه ليه
وائل: عشان انا انسان بشر بني ادم يعني بيحس وبيفرح وبيزعل وبيعمل حاجات صح وحاجات غلط وعاوز اعبر عن ده كله وافيد الناس باللي عندي والناس يفيدوني باللي عندهم

نفسي :ماشي ياوائل بس انت عارف ان الموضوع كده ممكن يا خد من وقتك كتير زي الناس اللي بقت كل حياتهم الوقتي علي النت لدرجة ان الواحد ممكن يكون مقصر في حاجات اساسيه في حياته زي عباداته وزي واجباته الدعويه وشغله .....الخ وماشاء الله علي مدونته جميله جدا ده غير ان انت يدوبك بترجع من الشغل علي 6 او 7 بيقي اليوم فاضله 4 او 5 ساعات بالكتير ومطلوب منك طبعا انك تتابع المدونه دوريا و تخش علي المدونات التانيه اللي عددها ماشاء الله وتعلق عليها

وائل: لا انا طبعا مش همشي في الشارع وهاقعد اكلم نفسي ياتري هاعمل ايه في المدونه النهارده ياتري الموضوع ده هينفع للمدونه ولا لأ ياتري هرد ازاي علي التعليق الفلاني
مش هعمل كده طبعا لان الموضوع فيه اولويات وان شاء الله هنظم وقتي بحيث لو جاتلي اي فكره او خاطره في اي وقت هكتبها بدون

الاستغراق في تفاصيلها وهخلي يوم في الاسبوع انقي فيه الفكره المناسبه واعرضها في المدونه يعني هخصص وقت لكتابة الموضوعات الجديده علي سبيل المثال ساعتين اسبوعيا ووقت للرد والتعليقات
ولو حسيت في يوم من الايام ان التدوين بيأثر علي الحاجات الاساسيه في حياتي هعمل زي استاذ مجدي في هصلي.. هدون

نفسي: طيب انت مش خايف من الكلام اللي بتقوله يعني كتير من المدونين الوقتي ممكن عشان قراله كتابين ولا موضوعين بيدي
لنفسه الحق انه يحكم علي اي حاجه يشوفها حتي لو مكنش علي درايه كامله بيها

وائل: في فرق كبير بين الداعي الي الله وبين العالم فالداعي الي الله ممكن يذكر الناس بقال الله وقال الرسول(ص)ا
وكده يعني اما العالم فده من حقه يكلم في الامور الشرعيه والفقهيه والافتاء وخلافه زي استاذ عمرو خالد كده دايما يقول انا داعي الي الله مش عالم فمحدش يسالني عن الحلال والحرام عشان دول ليهم ناسهم المتخصصين زي الدكتور يوسف القرضاوي وغيره
المدون نفس القصه هو مش عالم ولا احاط بكل شء علما وبالتالي فانا هنا اعبر رأيي في الحاجات اللي عارفها كويس وعندي معلومات اكيده عنها والمواضيع دي مش هبني عليها احكام وان ده واجب وده فرض لا خالص
انا مش هتكلم عن حاجه انا مش أهل اني اتكلم فيها

نفسي : ايوه بس انت كده هدخل نفسك في حوارات تانيه خالص وهي الرأي والرأي الاخر وهتبقي في مناقشات ساخنه وهنا يا صاحبي النيه هيكون ليها عامل كبير في الموضوع فيا تري نيتك هتكون لله ولا عشان تدافع عن رأيك ولا عشان الشهره ولا ايه

وائل :النقطه الاولي احنا منتهيين منها وهي الرأي والرأي الاخر لانها شئ مطلوب للوصول للصح وللغلط واكيد في الاخر لازم نحترم الاراء الاخري وبنكرر تاني نتعاون فيما اتفقنا عليه ويعذر بعضنا بعضا فيما اختلفنا فيه
اما قصة النيه دي فهي المشكله الكبيره وفعلا ربنا يستر

يقول الحق تبارك وتعالي "وقدمنا الي ماعملوا من عمل فجعلناه هباء منثورا"سورة الفرقان
وفي الحديث القدسي يقول الحق تبارك وتعالي "انا اغني الاغنياء عن الشرك فمن عمل عملا اشرك فيه غيري تركته وشركه"رواه مسلم
يقول النبي (ص) "ان الرجل لينطق بالكلمة من سخط الله لا يلقي لها بالا تهوي به في النار أبعد ما بين المشرق و المغرب "ا
بس ده كله لا يمنع من التدوين يقول الفضيل بن عياض: "العمل من أجل الناس شرك، وترك العمل من أجل الناس رياء، والإخلاص أن يعافيك الله منهما"ا
فالصح ان احنا ندون بس يكون نيتنا لله مش عشان اي حاجه تاني
قياريت حضرتك تفكريني قبل واثناء وبعد كتابة الموضوعات والتعليقات بأن النيه تكون لله

نفسي: طيب انا هاسيبك تدون بس بشرط عشان الكلام يكون ليه لازمه لا زم بعد كل موضوع فيه نقاشات
يعقبه موضوع بيلخص الواجبات العمليه اللي حضرتك طلعت بيها من خلال البوست بتاعك ومن خلال المناقشات بينك وبين زوار المدونه الكرام والموضوع ده هيكون في شكل نقط مختصره جدا وهتكون ملزمه مش لزوار المدونه طبعا انما هتكون ملزمه لحضرتك فيما بعد
وائل : موافق طبعا

يا تري كان ايه الصح وايه الغلط في الحوار اللي فات ؟؟؟؟؟؟

ياتري فيه ايه تاني لازم ناخد بالنا منه واحنا بندون ؟؟؟؟؟؟؟؟

يلا مستني تعليقاتكم عشان ندون صح

صح ولا غلط

زمان ايام الدراسه في المدرسه اوفي الكليه كنا بنفرح بالسؤال ده أوي_صح ولاغلط_ لانه

كان اسهل سؤال في الامتحان

وكنا بنزعل شويتين لما السؤال ده يجي مع التعليل

اما السؤال ده لو الدكتور مثلا قال انه مش جاي في الامتحان كنا بنصرب اخماس في اسداس_مصطلح بيدل علي الحيره_ا

اماالوقتي

وبعد مرور عام كامل فقط علي تخرجي من الجامعه ودخولي للحياه العمليه اهرب من هذا السؤال كثيرا

لانه فعلا اصبح اصعب سؤال في حياتي

بسأل نفسي دايما انا خلال السنوات اللي فاتت ياتري اتعلمت ايه كان صح وايه اللي كان غلط

طب والوقتي ايه الصح في حياتي وايه اللي غلط

كل واحد مننا عنده شغله العملي او الدنيوي واللي بيرجع منه اكيد مهدود وفاصل باور

وكل واحد مننا عنده شغله الدعوي _لو كان من الاخوان _او اي نشاط انساني بيعمله

عندنا أ سرنا وعائلاتنا اللي لازم نهتم بيهم خصوصا اللي متجوز مننا(ربنا يكون في عونه )ا

عندنا الجيران اللي لازم نتواصل معاهم

عندنا احبابنا واصحابنا

عندنا جانب التنميه الشخصيه (القراءه -الكورسات في مجال شغلك

دي كانت حاجات علي سبيل المثال لا الحصر وفي حاجات تاني كتير في ذهن كل واحد مننا لازم يرا عيها في حياته

ازاي تنظم حياتك في ظل كل هذه الواجبات وازاي تتعامل مع المشاكل الموجوده فيها

عشان كل ده كلنا لازم نقف وقفه للمحاسبه وانا اولكم

هتكلم عن بعض المشاكل اللي واجهتني وعرفت اتعامل معاها ومشاكل تانيه لسه مغلباني لغاية النهارده ومش عارف اتعامل معاها

هتكلم عن خواطري الشخصيه في النقط دي

هتكلم عشان

الصح نعملوه..... والغلط نصلحوه.... والرأي الاخر نناقشوه

ملاحظات سريعه

1-انا اكتب هنا عن رأيي الشخصي فبرغم اني انتمي للاخوان المسلمين ولكن ما يقال هنا يعبر عن رأي احد افرادها ولا يعبر عن الجماعه مطلقا

2-دعونا نتعاون فيما اتفقنا عليه ويعذر بعضنا بعضا فيما اختلفنا فيه فالمدونه اسعي فيها لايجاد حل لبعض المشاكل التي يعاني منها المواطن المصري المفحوت واللي انا والاخوان كلهم جزء منه فأتمني ان نسعي جميعا للبناء لا للهدم

3-كنت متحفزا جدا لفكرة التدوين منذ حوالي اربعة اشهر خصوصا بعد قيام صاحبي الانتيخ قصدي الانتيم _السباعي -بعمل مدونه له ولكن بيني وبينكم بعد اللي حصل في استاذ مجدي ترددت كثيرا وقلت لما عمنا مجدي بجلالة قدره بيحصلوا ده كله لمجرد انه بيقول رأيه امال هيعملوا فيا انا ايه؟؟

بس بعد الفحص والمحص قلت دام انا ليه اهداف من التدوين ده يبقي لازم اكمل واللي عاوز يعمل حاجه يعملها_بس ما حدش يشتم ولا يضرب _ا

كفايه عليكوا كده النهارده

المره الجايه اولي تدويناتي مع يلا ندون صح

سلام بقي