دبلة الخطوبة

الحمد لله الذي بنعمته تتم الصالحات

بعد الانتظار كثيرا كثيرا والبحث كثيرا كثيرا تم بحمد الله امس 7/11/2008 في حفل عائلي بهيج خطوبتي علي احد اخواتنا الفضليات

وعقبال كل العزاب (شاهين وجعلي وغازي واسامه ودرويش ومن علي شاكلتهم )ا

الحقيقي الواحد عنده كلام كتير قوي ومشاعر حقيقيه بس انتوا عارفين طبعا انه شرعا لايجوز(انا واخد بالرأي ده)اني اتكلم عن حاجه زي

كده مادام الموضوع لسه في طور الخطوبة

بس انا في حاجتين كنت عاوز ااقولهم كنصيحه لكل الناس وللمقبلين علي الزواج خاصة

ا-ماأخذ منك الاليعطيك

ده اول درس ترسخ عندي في الفتره اللي فاتت واللي كنت ببحث فيها عن شريكة المستقبل

يمكن الواحد يكون زعل في فترة من الفترات انه ماحصلش نصيب في موضوع ماويحس ان دي فرصه مش هتتعوض

بس لما ربنا رزقني وكرمني بخطيبتي الحاليه (وزوجة المستقبل ان شاء الله )حسيت فعلا بالمعني ده اوي انه لو ربنا اخد منك حاجه

اكيداكيد عشان هيديك حاجه تانيه فيها كل المواصفات اللي انت كنت بتتمناهاواكتر كتيييييييييير فثق تماما انه ماأخذ منك الاليعطيك

2-ماحدش بيجوز الامراته

وده المعني اللي علي طول استاذ عمرو خالد بيأكد عليه وهو ان كل واحد فينا مهما خطط هو والاخرين للزواج بفلانه الفلانيه فمش هيحصل

الالو ربنا قدر ده وفي المعاد والمكان اللي ربنا اراده فمحدش يزعل لو طول في فترة البحث لانه اكيد هيكون ليك نصيب في فلانه الفلانيه

في مكان ما وفي وقت ماوالحق تبارك وتعالي وحده يعلم ذلك وانت يجب ان توقن بذلك

ولما يحصل ده هتلاقي توفيق غير عادي من الحق تبارك وتعالي ليك وللطرف الاخرسواء في الارتياح النفسي وفي التفاهم وفي الاتفاقات

وفي الترحيب العائلي من الجانبين

دي مجرد خواطر كنت بعشها في الفترة اللي فاتت فحبيت انقلها لكم لعل وعسي ان افيد غيري بها

اما عن زوجة وشريكة المستقبل فسأكتفي مؤقتا بما نقلته في التدوينة السابقه والتي كانت بعنوان

الانسان الطيب

الانسان الطيب

كلمات منقولة

كلمات منقولة

*لاتتخيل كل الناس ملائكة فتنهار احلامك .......... ولاتجعل ثقتك بهم عمياء لانك ستبكي يوما ما علي سذاجتك

*قال الحسن ..رحم الله عبداً وقف عند همه ..فإن كان لله مضى وإن كان لغيره تأخر !

*ان الامير هو الذي يضحي اميرا يوم عزله ان زال سلطان الولاية كان في سلطان فضله

*دع الايام تفعل ماتشاء وطب نفساً اذا حكم القضاء ولاتجزع لحوادث الليالي فمالحوادث بقاء

*سلام علي الدنيا اذالم يكن بها ....صديق صدوق صادق الوعد منصفا

*إن لله في أرضه أنية و هي القلوب فأحبها إليه أرقها و أصفاها و أصلبهاثم فسره

فقال : أصلبها في الدين و أصفاها في اليقين و أرقها على الإخوان

*النفس تجزع أن تكون فقيرة، والفقر خير من غنى يطغيها، وغنى النفوس هو الكفاف فإن أبت فجميع ما في الأرض لا يكفيها

*قال رجل لعمر : إن فلانا رجل صدق فقال له : هل سافرت معه ؟قال : لا قال : فهل كانت بينك و بينه معاملة ؟قال :

لا قال : فهل ائتمنته على شيء ؟قال : لا قال : فأنت الذي لا علم لك به أراك رأيته يرفع رأسه و يخفضه في المسجد

*علمتني الحياة أن أجعل قلبي مدينة بيوتها المحبة وطرقها التسامح والعفو وأن أعطي ولا أنتظر الرد على العطاء

وأن أصدق مع نفسي قبل أن أطلب من أحد أن يفهمني

وعلمتني أن لا أندم على شي وأن أجعل الأمل مصباحا يرافقني في كل مكان

*فليتك تحلو والحياة مريــــرة وليتك ترضى والأنام غضاب وليت الذي بيني وبينك عامر وبيني وبين العـــالمين خراب

إذا صح منك الود فالكل هيـن وكل الذي فوق التراب تراب

*لا أحد ينكر أن الاستعمار لعب دوراً في تأخرنا، ولكن التأخر حدث قبل مجيء الاستعمار،

عندما توقفنا عن المناظرة والتعددية الفكرية، وانقطعنا عن تقليد مهم كان في الحضارة الإسلامية وهو الحوار والتعددية

*ليست الالقاب من تكسب الناس المجد ...بل الناس من يكسبون الالقاب مجدا

سبحان..
من جعل قلوب العارفين أوعية الذكر..
وقلوب أهل الدنيا أوعية الطمع..
وقلوب الزاهدين أوعية التوكل..
وقلوب الفقراء أوعية القناعة..
وقلوب المتوكلين أوعية الرضا..اللهم فاملأ قلوبنا بذكرك وطاعتك وخشيتك..

داخل القطار

داخل القطار

اصوات عجلات القطار المميزه تتسارع ، اصوات بشريه متتداخله تحيط بك من كل جانب ،الكل مشغول ويستعد ليتأقلم مع الوضع الذي سوف يبقي عليه لمده لا بأس بها وهي مدة سفره

حاله من السكون سادت ارجاء العربه التي اركب بها اللهم الا بعض المقاعد وكان منها المقعد الذي اجلس فيه
ورزقني الله بثلاث من الدكاتره واخذوا يتحدثون عن موضوع جذب انتباهي بشدة فأنصت لهم وتابعت الحوار

كان محور حديثهم عن الازمه الصحيه التي تمر بها مصرنا المحروسه حيث انتشار الامراض بكثره في جميع اوساط الشعب وفي نفس الوقت الخدمه المتدنيه الموجوده داخل المستشفيات ,ناهيك عن حال الاطباء اليوم والكوارث التي تتم بسببهم

بس هما مش كانوا بيتكلموا في المشكله زي ماكلنا بنعمل ،ولكن علي العكس تماما كانوا بيكلموا في مشروع هما بصدد الاعلان عنه لنظام طبي متكامل هايحاولوا من خلاله يقدمه نموذج يحتذي بيه في حل المشكله ديه وكانوا بيناقشوا تفاصيل المشروع الجديد من نوعه في مصرنا المحروسه


عم الصمت داخل ارجاء المكان مره اخري وذهبت الي احد الاماكن شبه الخاليه كي اخلد الي النوم وفوجئت باصوات تتعالي من المقعد الخلفي لي مباشرة وسمعت مجموعه من الشباب تتحدث عن حال مصرنا المحروسه وبدأواينتقدوا في كل شئ

تكلموا عن الحاله السياسيه التي تمر بها البلد وماوصلت اليه من فوضي وعشوائيه وعن الحالة الاقتصاديه وماوصل اليه حال المواطن من الفقر والمستوي المعيشي المتدني .......وهكذا في كل المجالات الاخري

لا اخفيكم سرا انه كان كلاما موزونا وله وقع علي الاذن وبنسبه كبير جدا جدا كلاما
لا يختلف اثنين علي صحته ولكن ما أدهشني هو الاتي

اخذوا بعد هذا التوصيف الرائع للمشاكل يتحدثون عن الاحزاب والجماعات الموجوده علي الساحه وبدأوا في انتقادها ايضا وهم متحمسون جدا للقول بان هذه الحكومه لاتجدي معها نفعا وانه لابد من ان يحدث شئ الهي لتغيير الوضع الذي نمر به

وصمتوا جميعا بدون ان يقدموا اي حلول لهذا الوضع القائم وبلا اي نيه للمشاركه في اي عمل اصلاحي
فقط هما قادرون علي الكلام المعسول والمؤدي الي الاحباط (هذا ما يجيدونه فقط)

بين هذا الموقف والموقف السابق خلدت الي النوم وتذكرت في احلامي وانا نائم هذه المقوله للدكتور صلاح صالح الراشد في كتاب (كيف تخطط لمستقبلك)
"ان هذه الامة تقوم بأطباء ومهندسين وعلماء هندسه وراثيه واساتذة شريعه وعلماء كيمياء ومليارديرات منفقين ودعاة حريه ودفاع عن حقوق الانسان وامهات متعلمات متصبرات فقيهات .....الخ"
ورأيت في المنام بعد ذلك امثله عديده للنموذج الاول الذي ذكرته فهولاء المهندسون متجمعون لمناقشة احد المشاريع التي تسهم في حل جزء من مشكله الاسكان التي نعيش فيها اما هولاء الاقتصاديون فهم منشغلون في تفاصيل المشروع الذي يسهم في حل جزء كبير من مشكلة البطاله وتدني الحاله المعيشيه للمواطن وهولاء الصحفيون منشغلون في اعداد الخطه التي تسهم في كشف الفساد والمفسدين وهؤلاء الدعاه تجمعوا ليواجهوا الحمله الاعلاميه التي ينجرف وراءها الكثير من الشباب ...........وهكذا كل في مجاله

افقت من حلمي وتمنيت من الله ان يتحول الحلم الي حقيقه وان اشارك في تحقيق هذا الحلم في مجال عملي وفي دعوتي وان لا اكون ممكن يكتفون برفع الشعارات والتنظير الذي لا فائده منه مالم ينبغي عليه عمل
اللهم آمين

وحدي بالمنزل

الف الف مليووووووووووووووووووووووووووون مبروووووووووووووووووووووووووووووووووووك




بعد ساعات من الان يتم انتقال اخي وشقيقي محمود من عالم العزوبيه الي عالم الزوجيه السعيد (عقبالي يارب)



ان شاء الله هتكون الدخله النهارده ومحمود اخويا من الاخوان وهيتم زفافه علي احد اخواتنا وهي الدكتوره شيماء

وطبعا طبعا الزواج الللي هيتم النهارده له ابعاد سياسيه عندي في البيت منها

1- ان كل اخواتي بفضل الله اتجوزوا ومكنش فاضل غير محمود وده معناه طبعا في المقام الاول ان انا خلاص الطريق

بقي فاضي قدامي وان انشاء الله الدور عليا

2- وفي المقام التاني ان انا من النهارده هاقعد في البيت لوحدي مع والدتي وطبعا الواحد زعلان انه هيقعد لوحد

ه بس نعمل ايه بقي ده قدر ومكتوب علينا

وفي نفس الوقت برده

القعده لوحدي في البيت فيها مميزات كتير يعني الواحد هياخد راحته بقي وهبرطع في البيت لوحدي

لالالا هاتظبط كتير كتير

اخيرا اليوم 7/7/2008 هيشهد احتفالا غير مسبوق بأذن الله بزواج اخي المبارك

وانشاء الله يكونوا خير مثال لزوجين متحابين في ظل طاعة الحق تبارك وتعالي

نيولوك

اخيرا والحمد لله رجع الadsl عندنا تاني بعد انقطاع دام طويلا وانشاء الله مايتكررش الكلام ده تاني

تجربة مفيدة

كده بالظبط مر علي انشاء المدونه دي سنه كامله وكان لازم الواحد يقيم التجربه دي وهل هي صح ولا غلط ويعيد ترتيب الاوراق من تاني

وبعد الفحص والمحص توصلت الي انه في اعتقادي الشخصي ان التجربه علي مستواي الشخصي فقط كانت مفيده جدا للاسباب الاتيه

1- كسر الحاجز النفسي : يعني قبل كده ممكن الواحد كان يدخل يعلق في مدونات تانيه او يرد علي مواضيع في مواقع ردود قصيره بس مكنتش بقعد مخصوص عشان اكتب موضوع معين شاغلني وأأقول فيه رأيي وحتي وان كانت المواضيع اللي اتكتبت مش مفيده لحد فهي كانت مفيده بالنسبه ليا

2- فضفضه : كتير الواحد مننا بيقبي محتاج انه يطلع الافكار والمشاعر الشخصيه اللي بيحسها اوينقل تجارب هو مربيها واستفاد منها وعاوز يفيد بيها غيره

3- كثرة الاطلاع : لانك لما بتكتب موضوع وعاوز تقول فيه رأيك يفضل انك تقرأ الاراء التانيه في الموضوع الاول وبتيدأ تكون داتاباس تنطلق من خلالها في توصيل فكرتك

4- التعلم من الاخطاء : ودي اكبر استفاده من القصه دي كلها لان الحياه عموما مجموعه من التجارب لابد ان تخوضها وان تتعلم من اخطائك في التجارب السابقه حتي تكون نسبة النجاح في التجارب اللاحقه اكبر

5- للتاريخ : حقيقي الواحد هيكون سعيد لوان شاء الله بعد عشر سنين من الوقتي او اكتر اقعد يقلب في صفحات المدونه ويفتكر هو كتب الموضوع ده عشان ايه وكان اسلوبه في الكتابه عامل ازاي ويفتكر المواقف اللي مربيها خلال المده دي وكتب عنها بحلوها ومرها وتبدأ تخلي اولادك يشوفوا الموضوعات دي ويقلبوا في ذكرياتك وممكن كمان يقلبوا عليك المواجع بس مش مشكله

ده كان علي مستواي الشخصي اما علي مستوي زوار المدونه الكرام فمش حاسس انهم استفادوا كتير من الموضوعات اللي اتكتبت

ممكن يكون اسلوب الكتابه مش اللي هو قوي بس اهو الواحد لسه بيتعلم برده

ممكن يكون اختيار المواضيع و طريقة تناولها وعرضها بعيده شويه عن الواقع بس اهو الواحد لسه بتعلم برده

ممكن الواحد مكنش منظم في وقته شويتن وبالتالي مكنتش بدي اهتمام للمدونه وتحديثها ... ده بقي شئ اكيد مش ممكن لاني فعلا المدونه مكنتش مخصصلها وقت محدد وكنت بسيب الموضوع بظروفه يعني لما اكون فاضي تماما اشتغل في المدونه

الخلاصه

كان حد نصحني نصيحه وقالي ان المدونه دي حاجه شخصيه جدا بمعني تاني عالمك الشخصي بتحط فيها افكارك وارائك والمواقف اللي بتمر بيها ...الخ فمحدش له حاجه عندك يعني تكتب كل يوم كل شهر كل سنه مش مهم دي حاجه راجعالك انت حسب الظروف يعني والناس تستفيد بالكلام او ماتستفدش ده برده مش مهم لانك بتبذل اقصي جهدك عشان تفيد غيرك بس لو ما استفدش مش مهم لانها مدونتك انت مش مدونته هو

وفي الاخر الواحد زي ماقلنا اكيد استفاد من التجربه واتعلم من اخطاءه فيها وان شاء الله هحاول يكون الاداء افضل بكتير من قبل كده

وعشان ده كله الواحد كان لازم يعمل نيولوك للمدونه

ان شاء الله راجع قريب جدا

اسف جدا جدا علي فترة الانقطاع ديه

بس المشكله ان احنا غيرنا وصلة الadsl من شركه وهنشترك مع شركه تانيه

وطبعا الانتقال من شركه لتانيه ده طلع حوار كبير فيارب اقدر اخلصه بسرعه وانجز

نلتقي قريبا ان شاء الله