من الثانويه
دي كانت كل مشكلتي وانا في الثانويه العامه
اني لازم اذاكر كويس عشان ادخل هندسه
ونفس المشكله بتواجه ناس كتير اوي من طلبة الثانويه (علمي رياضه طبعا)ا
وكل الناس بتحسسك انك لو مادخلتش هندسه يبقي انت ضعت وروح ولع في نفسك احسن
لانك هتتدخل كلية تجاره كليه الشعب يعني
يدوبك 45 الف بني ادم مش كتير اوي يعني والعدد ده موجود بالفعل في تجارة القاهره
وشاءت الاقدار اني ادخل بالفعل كلية تجارة القاهره
وطبعا ساعتها كنت مدمر نفسيا
ااقول ايه للناس واداري خيبتي القويه ازاي
ويا شماتة ابله ظاظا فيا
هو بصراحه ماحدش لامني بس كنت حاسس بنظرات مش اللي هيا من الناس اللي حواليا
وفضل الحال علي ماهو عليه وكنت بسمع كتير من الناس من اخوانا اللي كانوا بيشجعوا الواحد
علي المذاكره وكنت بسمع كلامهم بس من جوايا مش مقتنع تماما باني اذاكر
طب وهذاكر ليه عشان اطلع في الاخر حتة محاسب في شركه واخدلي300 او 400 جنيه في الشهرومهما عملت هافضل برده محاسب _
ودي كانت فكرتي عن خريج تجاره انه لازم يشتغل في الحسابات واخره يعني لما يتمعظم (جايه من العظمه)ا_
هيمسك الحسابات في الشركه بعد عمرطويييييييييييييل طبعا
بس كنت مقتنع ان الحسابات دي كلام فارغ
ومينفعش الواحد يفضل طول عمره قدام الارقام كده ويعمل حاجات روتينيه ممله بشكل دوري
المراجع المالي فلان الفلاني يتحدث
المكان : واحد من اكبر مكاتب المراجعه
الزمان :اجازة سنه تالته كليه
الاشخاص
1-
صديق اخويا وواحد من مديرين تلاته في هذا المكتب
2-
المدعو وائل اللي هو انا يعني
المناسبه :تحت ضغط كبير من الناس اللي حواليا خصوصا اخويا الكبير اني لازم اروح اتدرب
في المكتب واشوف الحياه العمليه علي طبيعتها وكان رد فعلي ساعتها اني مش هروح ولو علي جثتي وده طبعا عشان الخلفيه الجميله اللي عندي عن الحسابات
المهم بعد شد وجذب ومناقشات قبلت علي طريقه خد فكره واشتري بكره وكمان كنت عاوز احدد هادخل قسم ايه في سنه رابعه
محاسبه ولا اداره
داخل المكتب
اول لقاء ليه مع صديقنا المدير وطبعا قعد يكلمني عن نفسه وازاي هو وصل للي فيه وقد ايه تعب
وطبعا كنت معجب بكلامه جدا وبسيرته وكفاحه ووعدني بقعده تانيه يكلمني فيها عن المحاسبه وفروعها
بعد القعده التانيه دي عرفت كويس اللي بيتخرج من قسم محاسبه ايه المجالات اللي تتوفرله في الشغل وغير عندي كل المعتقدات
اللي كنت اعرفها عن خريج قسم محاسبه كلية التجاره
وبعدين وداني للاستشاري الاداري بتاع المكتب عشان يكلمني عن الاداره وبعد القعد معاه اتغيرت برده كل المعتقدات اللي اعرفها عن خريج قسم ادارة الاعمال كلية التجاره
بغض النظر انا اخترت ايه وليه اخترت المجال ده
بدأت بعد الشهر ده اسأل اكتر واستفسر اكتر عن الكلام النظري اللي انا سمعته جو المكتب
فتردد امامي ورأيت الاتي
فلان الفلاني مدير المبيعا ت في الشركه الفلانيه واللي هو خريج تجاره
وفلان الفلاني مدير التسويق في الشركه الفلانيه واللي هو خريج تجاره برده
وفلان الفلاني مدير المشتريات في الشركه الفلانيه واللي هو خريج كلية تجاره
وفلان الفلاني المدير المالي للشركه الفلانيه واللي هو خريج كلية التحاره
وفلان الفلاني مدير ادارة الموارد البشريه في الشركه الفلانيه واللي هو خريج كلية التجاره
وغيرهم وغيرهم كتير اوي
وساعتها بدأت نظرتي تتغير عن الكليه واكتشفت اني خلال السنوات الاولي ليا في الكليه كان عندي معتقدات كتير
جدا غلط وبدأت في انقاذ مايمكن انقاذه وايقنت تماما ان خريج كلية التجاره ليس دوره فقط ان يكون احد المديرين اللي ذكرتهم بل وايضا يمكن ان يضيف من خلال هذا الدور اشياء كثيره للمجتمع في مجالات سوف نتحدث عنها ان كان في العمر بقية
في التدويتات القادمه
1-عن كلية تجاره اتحدث
2-لو سيادتك في تجاره تعمل ايه(كذا تدوينه ان شاء الله )ا
واللي هنتاول فيها ان شاء الله الحديث بالتفصيل عن مالا يعرفه الناس عن كلية التجاره
وايه المؤهلات اللي اللي لازم تكون عند خريج كلية التحاره عشان يتخرج ويشتغل في المكان الصح واللي لازم يبدأيكتسبها من سنة اولي
ملحوظه اخيره
الكلام مش للناس الموجوده في كليات التجاره بس
يا جماعه دي معنقدات كتير غلط عند الناس كلها عن الكليه العظيمه دي ولازم كلنا نعرف الصح فيها ايه
لانك اكيد ليك قريب او صاحب في الكليه دي وعنده نفس المعتقدات الخاطئه
والاكيد الاكيد انك هيكون ليك قريب في ثانويه عامه وخايف جدا انه يخش الكليه عشان الكلام اللي بيسمعه عنها
انتظرونا قريبا جدا والصح والغلط في كلية التجاره
هناك ١١ تعليقًا:
كويس جداً يا وائل
استمر يبني
ماشي يا وائل .. ولو أن اسم التدوينة فور دمي .. بس اما قرأت التدوينة أعجبني انها عمليه جدا كالعادة .. بس برده في الاخر انت غير موفق في اختيار عنوان التدوين .. أوتوماتيك أول ما قرأته قلت هندسة طبعا .. بالتوفيق
تدوينة كويسة
بس كان نفسى اخش هندسة برده
بالرغم من انى بحب كليتى و دلوقتى بحب شغلى
وبسالك سؤال مش بسخن و لا حاجة : ايه اللى بينك و بين شاهنشى ماله بيخبط فيك ليه كده
و صحيح ليه عنوان التدوينة كده
كان احسن لو ما قارنتش
بس بجد تدويناتك كلها مفيدة
و شكرا
محمد
خدت انا ايه بقي من كويس دي
ده انت حتي من اهل تجاره
يعني لازم تشارك بأفكارك معانا
ولا ايه يا نجم
شاهنشي صديقي العزيز
يا سيدي لو العنوان زعلك ممكن نغيره عشانك
يا سلام
احنا عندنا كام شاهنشي
ولو عاوز كمان نغير الموضوع ونكلم عن هندسه
فانت تأمر يا حماده
بس القصه ان ان انا مش قصدي والله من التدوينه اني اكره الناس من هندسه او اقلل من شان الكليه العظيمه دي
لا والله خالص
انما قصدي ان الثقافه بتاعتنا لازم تتغير وزي ماعندنا مهندسين ناجحين واطباء ناجحين
فلازم يكون عندنا خريج كلية تجاره ناجح عارف بيشتغل ايه وايه هدفه في الحياه
ومن هنا مفيش مانع ان لو اب لقي ابنه مش عاوز يخش هندسه ولاطب انه يستجيب لكلامه وده طبعا مش موحود في الواقع المصري عندنا
عشان زي ماقولنا في ثقافه سيئه عن خريج كلية التحاره
سنوسي
انت بتهدي النفوس ولا ايه يا عم الحج
وزي ماوضحت في التعليق السابق انا مش بقارن ولا حاجه
انا بحاول اغير انطباعات وثقافات الناس عن كليتنا
اخى وائل
جزاك الله خير على التدوينة الجميلة دى
اللى بجد حاسس انى هستفاد منها كتير
ومستنى البقيه
استمر ومتتاخرش
والله معك .
استاذنا وائل ربنا يكرمك القصة كلها اقدار من الله عز وجل يعني دخلت تجارة هندسة كلية البدنجان الارزق هي اقدار من الله والواحد ميعرفش الخير فين
دي حاجة
تاني حاجة كلية تجارة فعلا الميزة اللي فيها ان الل بيخرج منها فاهم مش بيفهم علوم تجارية بس وبيتعلم علوم حياتية اكثر من اي شئ بل انه يتعلم الحياة نظرا لكثرة الطلبة فهذا في الاصل زيادة للخبرة وفنون التعامل مع طباع البشر
تالت حاجة
كفاية ان محمود عز في كلية تجارة دي كفاية عليها عشان يخلوها كلية عظيمة يعني الاربع سنين الجية ان شاء الله هتلاقيها من كليات القمة لاني قعدت بس فيها اربع سنين او خمسة
ربنا يكرمه عز ده
والسلام
خالد _كلام من القلب
واياكم يا باشا وربنا يتقبل
واتمني من الله انك تستفيد بيها فعلا
عز اللي واخد مقلب في نفسه
قال ايه كفايه انك في الكليه
وسعت منك شوية دي يا عز
وبالنسبه لموضوع الاقدار فهي فعلا اقدار بس بعد ماالواحد يكون عمل اللي عليه
اما النقطه التانيه فجزاك الله خيرا عليها لا نها فعلا حقيقه
بس انا ااقصد من التدوينه المجال العملي والحياتي (البزنس يعني )واللي لو عملناه صح هنكون برده بنخدم الاسلام وبنساعد في نهضة بلدنا
اخيرا جزاك الله خيرا علي التعليق وعاوزين نشوفك قريب يا بطل
صراحة بتابع المدونة من زمان بس مش بعلق
لكن التدوينة ديه أثارت عندي اني لازم اعلق عليها لانها بتتكلم على كلية تجارة
يبقى اكيد لازم اقول رأي
حضرتك فعلاً عندك حق ان في معتقدات كتيرة جدا غلط عند الناس عن كلية تجارة حتى لما بيسألو انت في كلية ايه لو سمعو بس تجارة بينظرو نظرة وحشه جدا معرفش يعني هي مالها الكلية ديه
في انتظار باقي التدوينات ان شاء الله
خريجة كلية العظماء
إرسال تعليق